لاہور :پاکستانی اداکارہ یشمہ گِل نے کہا ہے کہ زندگی میں اچانک جو کچھ اچھی چیزیں ہوئیں وہ صرف اللّٰہ تعالیٰ سے تعلق کی وجہ سے ہوئیں۔ ثمینہ پیرزادہ کے ڈیجیٹل شو میں اپنی زندگی کی کہانی سنائی اور بتایا کہ کس طرح وہ لادینیت سے مذہب کی طرف مائل ہوئیں۔
اداکارہ نے بتایا کہ پہلے ان کا ایمان بے حد کمزور تھا اور وہ مذہب کے حوالے سے سب سے بحث کرتی تھی، پھر وقت کے ساتھ ساتھ انہوں نے اللّٰہ کی موجودگی پر یقین کرنا شروع کیا، ان کا کہنا تھا کہ اب میں دین اسلام پر عمل کرنے کی کوشش کرنے والوں میں سے ایک ہوں۔
یشمہ گِل نے بتایا کہ کم عمری میں ڈپریشن کا شکار ہو گئی تھی اور ہر چیز کو اپنے نظریے سے دیکھتی تھی، سوچتی تھی کہ اگر اللّٰہ واقعی ہے تو میری تمام تر پریشانیاں کیوں حل نہیں ہوتیں؟
انٹرویو میں گفتگو کرتے ہوئے اداکارہ نے بتایا کہ جب میں اپنی پڑھائی مکمل کرنے کے لیے آسٹریلیا گئی تو وہاں میری ایک ایسی لڑکی سے ملاقات ہوئی جس کا نام وردا تھا اور وہ حجاب کرتی تھی،
اسے دیکھنے کے بعد ہی میرے ذہن میں فوراً یہ خیال آیا کہ میں کبھی بھی اس کی دوست نہیں بن سکتی کیوں ہماری سوچ بہت مختلف ہے مگر جب میں نے اس کے ساتھ کچھ وقت گزارا تو وہ ایک اچھی انسان ثابت ہوئی اور پھر ہماری دوستی ہو گئی۔
اداکارہ نے بتایا کہ میری دوست وردا نے مجھ سے کہا کہ رمضان آنے والے ہیں تو تم نے پورے مہینے روزے رکھنے ہیں اور 5 وقت کی نماز ادا کرنی ہے ایسا کرنے کے بعد تمہیں اپنے اندر خود ہی فرق محسوس ہوگا۔
وردا کو غلط ثابت کرنے کے لیے میں نے اس کی باتوں پر عمل کرنا شروع کیا تو ابتداء میں مجھے اپنے اندر کوئی فرق محسوس نہیں ہوا لیکن جیسے جیسے رمضان کا مہینہ آگے بڑھتا گیا میری زندگی میں کافی مثبت تبدیلیاں رونما ہونا شروع ہوگئیں، میرے اپنے گھر والوں کے ساتھ تعلقات بہتر ہو گئے اور مجھے آسٹریلیا میں نوکری بھی مل گئی۔
جیسے ہی رمضان کا مہینہ ختم ہوا تو میں نے نماز چھوڑ دی جس کی وجہ سے مجھے واپس ڈپریشن شروع ہو گیا جس کے بعد مجھے یہ احساس ہوا کہ یہ تمام تر اچھی چیزیں جو اچانک میری زندگی میں ہوئیں، یہ صرف اللّٰہ تعالیٰ کے ساتھ تعلق کی وجہ سے ہوئیں، اور اس طرح میری زندگی لادینیت سے اسلام کی جانب بڑھی۔
یشمہ گِل حال ہی میں ڈرامہ ’الف‘ میں بھی معاون اداکارہ کی حیثیت سے دکھائی دے رہی ہیں
0 تبصرے